ՄԱԿ. էբոլայով վարակվածների թիվն անցել է 16.000-ը. ankakh.com

Ըստ Առողջապահության համաշխարհային կազմակերպության՝ էբոլայով վարակվածների հաստատված և հնարավոր թիվը հասել է 16.000-ի, մահացել է 7.000- ը:

ՄԱԿ-ի առողջապահական գործակալությունն իր հրապարակած վերջին զեկույցում կենտրոնացել է Գվինեայում, Լիբերիայում և Սիերա Լեոնեյում էբոլայի վարակի տարածման վրա:

Վարակն ամենամեծ տարածվածությունն ունի Լիբերիայում, որտեղ ԱՀԿ տեղեկություններով՝ գրանցվել է էբոլայի հաստատված և հավանական 7.244 դեպք, մահացել է 4.181 մարդ:

ԱՀԿ-ն և այլ առողջապահական կազմակերպություններ կանխատեսել են, որ էբոլայով վարակվածների թիվն ավելի կաճի ներկայիս թվից, քանի որ բազմաթիվ մարդիկ մահանում են նախքան ախտորոշվելը:

Առողջապահության համաշխարհային կազմակերպության տվյալներով՝ վերջին հինգ շաբաթների ընթացքում Լիբերիայում իրավիճակը կայունացել է, քանի որ սեպտեմբերի կեսից մինչև հոկտեմբերի կեսը վարակման տեմպերը նվազել են:

Աֆրիկայում էբոլայի նման վարակների տարածումը նորություն չէ, սակայն վերջին շրջանի համաճարակն առավել վտանգավոր և մահացու է նախորդների համեմատությամբ: ԱՀԿ-ի տեղեկություններով՝ էբոլայով վարակվածների 60 տոկոսը մահացել է:

Հարցեր, պատասխաններ, մեկնաբանություններ